×
Skakel na Engels

Ons Koek-sterre se geheime

Met dié kennerswenke oor die kuns van koekbak kan jy sélf ’n bobaas-bakker word

Die ses Koeksterre wat in ons April-uitgawe verskyn het deel hul geheime oor die kuns van koekbak – alles van die voorbereiding tot die bestanddele en versiering.

 

Annica se geheim vir suksesvolle lae

  • In plaas van om hoë koeke te bak, bak dunner koeke wat in lae opmekaargestapel kan word. Jy kan sodoende nie net met meer geure vir elke laag eksperimenteer nie, maar die koeke sal nooit droog wees nie en regdeur egalig wees.
  • Gebruik altyd vars bestanddele en moenie skaam wees om te eksperimenteer nie. Voeg beet, sitroengras, of vanieljepeule by jou resepte en ‘n nuwe wereld vol koekgeure sal vir jou oopgaan.
  • Rol jou suiker- of modeleerpasta uit deur groentevet of wit margarien in plaas van versiersuiker te gebruik. Dit skep dunner lae sonder om die versiersuiker uit te droog. Wees geduldig en moenie oorhaastig wees nie. Elke stap is ’n kunsvorm op sy eie.

Kontak Annica van Rensburg by www.annicascakes.co.za of 011 326 1526.

 

Deon se spuitversiersel-geheime

  • Die drie reëls vir suksesvolle spuitversiering is: egaligheid, die regte drukking wat uitgeoefen word en die regte hoek waarteen jy die spuit moet hou. As jy dit regkry, sal jy beheer hê oor jou werk. As jou hand bewe, kan jy jou arm op die rand van die werkoppervlak laat rus of dit met jou ander hand steun. Oefen op bakpapier voordat jy die koek self aandurf.
  • Gebruik altyd produkte van ’n goeie gehalte – die beste eiers, botter en versiersuiker. Die tekstuur van die harde versiersel behoort sag tot medium te wees. As dit te sag is, sal dit afloop.
  • Vul die versiersak korrek sodat daar geen lugborrels is nie. As daar lugborrels is, kan die versiersuiker onegalig wees of ’n kronkellyn maak terwyl jy versier.

Kontak Deon Swarts by  www.thecakegenie.co.za  of 083 307 5138 of 011 680 6314.

 

Khensani se voorbereidingsgeheime

  • Beplan lank voor die tyd aan jou koek en maak seker jy’t alles wat jy nodig het. Dis ongelooflik frustrerend om te begin koekbak en dan agter te kom die suiker is op!
  • Maak seker jy het vooraf al jou bestanddele afgemeet en voorberei voordat jy begin. Jy behoort die hoofbestanddele akkuraat af te meet, maar jy kan die geurmiddels na smaak aanpas – kakao, vanielje of wat jy ook al gebruik. Bêre droë bestanddele in lugdigte houers nadat jy dit oopgemaak het.
  • As jy ’n nuwe koekontwerp probeer, oefen eers op ’n kleiner ‘toetsmodel’ voor jy die ware Jakob aandurf.

Kontak Khensani Peters by www.ntshovelocakes.co.za, bel 082 551 4094 of e-pos khensi@ntshovelocakes.co.za.

 

Lucy se flater-vrye geheime

  • As jou koek soos ’n oopgebarste vulkaan lyk wanneer dit uit die oond kom, het jy moontlik te veel meel gebruik en die oond was te warm toe jy die koek ingesit het.
  • As jou koek altyd rondom die rande gebrand is, maar dis nog rou in die middel, het jy dalk die koek te vinnig gebak. Verlaag die oondtemperatuur en bak die koek langer. Dis veral ’n nuttige wenk as jy ’n groter koek vir ’n spesiale geleentheid bak.
  • As jou koek ’n digte tekstuur het en nooit veerlig is nie, het jy moontlik die beslag te veel geklits. Meng dit liggies. Onthou altyd dat bakwerk ook ’n wetenskap is, daarom moet jou bestanddele presies afgemeet wees.

Kontak Lucy Markewicz by www.lucyscakeshop.co.zae-pos info@lucyscakeshop.co.za of 082 564 5804.

 

Roxanne se flater-vrye geheime

  • Moet nooit die gehalte van jou bestanddele inboet nie. Ek gebruik vars plaasbotter, eiers van skrophoenders, steengemaalde, ongebleikte meel en die beste gehalte suiker en sjokolade. Hoewel dit meer kos, kan jy die verskil proe, want bestanddele jok nooit nie!
  • Moenie net al die bestanddele in ’n menger gooi en verwag dat die koek eksieperfeksie moet uitkom nie. Jy moet geduldig wees.
  • Sif altyd die meel en bakpoeier minstens twee keer sodat dit behoorlik opgeneem word en die koek veerlig is. Moet nooit meel op ’n hoë spoed byvoeg of te veel meng nie, want dit sal ’n swaar, kompakte koek tot gevolg hê.

Kontak Roxanne Floquet by www.roxannefloquet.come-pos roxanne@roxannefloquet.com of 083 226 2471.

 

Wade se versiergeheime

  • Gebruik altyd versiersuiker van goeie gehalte. Die meeste handelsmerke is nie suiwer nie omdat mielieblom gebruik word om dit te verdik, en dit maak die versiersuiker grys. Ek gebruik net Huletts.
  • As jy botterversiersel of sjokolade-ganache glad wil maak, kan dit help om dit waarin jy dit aanmaak, ’n bietjie te verhit of ’n warm slaplemmes te gebruik (doop dit in warm water en droog dit af); dit laat die vet smelt. Op koue dae het ek al selfs ’n haardroër gebruik.
  • Druk fondant-versiersuiker bo-op gedetailleerde materiaal as jy gebosseleerde tekstuur op versiersuiker wil skep. Kyk in jou huis rond; jy sal verbaas wees oor wat jy als kan gebruik. Maak seker dit is skoon en droog.

Kontak Wade Van der Merwe by www.wadescakes.co.zae-pos wade@wadescakes.co.za of 082 932 4522.

Hou jy hiervan?
op ons GRATIS Goeie Huishouding-resepnuusbrief
 
Sjokolade verminder die risiko op hartkwale

Dié lekkerny sal jou hart tjoklits laat klop!

Close