×
Skakel na Engels

Word jy in die middel van die nag wakker? Hier is raad …

Dis so frustrerend as jy snags wakker word en nie weer aan die slaap kan raak nie! Volg hierdie raad vir ’n salige nagrus
wakker

1. Hou op om jou daaroor te bekommer

Sê vir jouself dat dit nie noodwendig ’n probleem is nie – die meeste van ons word snags wakker, al is ons nie daarvan bewus nie. Probeer om nie jou horlosie dop te hou nie, en as jy ’n boek, breiwerk of ’n legkaart in die kamer langsaan het, en ná 15 tot 20 minute steeds wakker is, kan jy opstaan en jouself besig hou totdat jy vaak word.

2. Trek spaarkamer toe

’n Gekriewel, duvet-trekkery of gesnork speel alles ’n rol in onderbroke slaap. Trouens, ’n lawaaierige bedmaat kan jou slaap heeltemal omdolwe, en dis meestal vroue wat aan die kortste ent trek. Dit is nie ideaal nie, maar indien niks anders werk nie, kan jy jou snorkende maat verlaat en in ’n ander kamer gaan slaap.

3. Wees voorbereid

Hormoonveranderinge en warm gloede gedurende jou menopouse kan jou slaap heeltemal in die wiele ry. Hormoonveranderinge bring jou liggaam onder die indruk dat hy besig is om te oorverhit – vandaar die nagtelike gloede. Dra ligte katoennagklere en gebruik ligte beddegoed. Wapen jouself sommer ook met ’n ekstra kussingsloop, handdoek, koel waslappie, waaier en ’n glas koue water.

Lees: 10 feite oor menopouse

4. Laat staan die nagsopie

Alkohol is ’n heerlike kalmeermiddel wat jou vinnig sal laat insluimer, maar die uitwerking is van korte duur en sal met jou slaap inmeng, veral laatnag sodat jy vroeg wakker word. Beperk jou alkoholinname en hou dit by ’n drankie saans. Probeer ook om van vroegmiddag af nie meer koffie te drink nie. Navorsing toon dat kafeïen wat tot ses ure voor slaaptyd gedrink word, jou slaap kan affekteer.

En as jy sukkel om te slaap of taamlik gereeld wakker word, kan jy gerus die volgende probeer … 

1. Eet ’n kiwi

Wetenskaplikes van Taiwan het bevind dat twee kiwi’s voor slaaptyd mense help om vinniger in te sluimeren beter te slaap. Die navorsers het die slaapgehalte van 24 vrywilligers met slaapprobleme bestudeer, en nadat hulle ’n maand lank elke aand kiwi’s geëet het, is daar bevind dat elke aspek van hul slaap verbeter het.

Die persone het vinniger aan die slaap geraak en dieper geslaap; hul algehele slaaptyd het toegeneem en hul slaapdoeltreffendheid (die hoeveelheid tyd wat daar geslaap word in vergelyking met die totale tyd in die bed) het verbeter.

2. Geniet ’n warm bad

Volgens studies kan ’n warm bad of stort twee ure voordat jy in die bed klim, jou vinniger aan die slaap laat raak – solank daar genoeg tyd is om ná die tyd af te koel. Liggaamstemperatuur speel ’n belangrike rol in die regulering van sirkadiese ritmes, en die verhitting van jou liggaam help in werklikheid om dit vinniger te laat afkoel en jou gereed te maak vir slaap.

Lees: 8 goed wat ons moet ophou om in die stort te doen

3. Sit laventel op jou kussing

Daar is geen waarborge nie, maar navorsers het die breingolwe van slapers gemonitor wat in hul slaap aan laventel blootgestel is, en daar is bevind dat hulle dieper geslaap het en die volgende oggend meer energiek gevoel het as diegene wat dit nie gedoen het nie.

4. Kyk na jou dieet

Meer vesel en minder versadigde vette en suiker kan dalk die ding doen. ’n Studie aan die Columbia University in New York het bevind dat mense wat meer vesel eet, ’n groter hoeveelheid tyd in diep slaap deurbring terwyl hoër innames van vet met korter herstellende slaap geassosieer word. ’n Hoë suikerinname is ook met meer onderbroke slaap geassosieer.

Vrywilligers wat laevet-, hoëproteïen-maaltye geëet het wat deur ’n voedingskundige voorberei is, het ná net 17 minute aan die slaap geraak terwyl diegene wat self hul kos gemaak het, gemiddeld 29 minute geneem het om aan die slaap te raak. Daar is al hoe meer bewyse dat jou dermgesondheid ’n invloed op jou slaap kan hê.

Die slaaphormoon melatonien word in die dermkanaal sowel as die pineale klier in die brein aangetref, en dermbakterieë speel ’n rol in die produksie van melatonien en serotonien (wat ook by slaap betrokke is). Om na jou dermgesondheid te kyk, kan dus ook jou slaap verbeter.

Uit: Good Housekeeping UK

FOTO: iStock/OcusFocus

LEES OOK:

How to prepare your bedroom for the best night’s sleep

Can sleeping on your back delay the signs of ageing?

Certain sleeping patterns can affect weight gain

Hou jy hiervan?
op ons GRATIS Goeie Huishouding-resepnuusbrief
 
Ruk só jou slaapkamer reg vir ’n goeie nagrus

Skep die regte atmosfeer vir ’n behoorlike nagrus. Deur Natalie Healey

Close