×

Geglaseerde kalkoen met vleissous

  • 30 min
  • 210 min
  • 8
  • Easy
FavoriteLoadingAdd to My Recipe Book

Resep Bestanddele

Bestee soveel moontlik aan jou kalkoen – dit sal nie net beteken dat hy ’n beter lewenstandaard gehad het nie, maar die vleis se tekstuur en geur sal ook opmerklik beter wees.

  • 5,4 kg vryloopkalkoen
  • 1 x kalkoenvulsel 
  • 2 suurlemoene, met die skil, in skyfies gesny
  • 2 uie, met die skil, in skyfies gesny
  • 20 g vars salie, plus ekstra (opsioneel) vir garnering
  • 2 e olyfolie

VIR DIE GLASEERSEL

  • 50 g botter, gesmelt
  • 2 e loperige heuning
  • 1 e Dijon-mosterd

VIR DIE VLEISSOUS

  • 25 g gewone meel
  • 400 ml hoenderaftreksel
  • 2 e whisky
  • 2 e loperige heuning

Resep Aanwysings

    1. Haal die kalkoen 1 uur voor kooktyd uit die yskas om dit  kamertemperatuur te laat bereik.
    2. Voorverhit die oond tot 190 °C. Plaas die kalkoen met sy bors na bo op ’n snyplank en trek enige veertjies met ’n haartangetjie uit. Druk met kombuispapier droog. Lig die nekflap en gebruik jou vingers om die vel versigtig van die bors los te maak. Plaas die vulsel in die nekholte. Draai die kalkoen op sy bors om, trek die nekflap oor die vulsel toe en steek dit met ’n hout- of tandestokkie vas. Weeg die kalkoen en bereken die kooktyd; 30 tot 35 minute per kilogram.
    3. Maak ’n drievoet in ’n groot, stewige roosterpan met van die suurlemoen- en uieskyfies, en plaas die res saam met die salie in die kalkoen se buikholte. Bind die pote vas, smeer die kalkoen oraloor met olie en geur. Bedek losweg met foelie.
    4. Rooster vir die berekende tyd en bedruip dit af en toe (voeg ’n bietjie water by die sous in die pan as die vel aan die bodem raak) en verwyder die foelie vir die laaste 45 minute van die kooktyd. Wanneer jy die foelie verwyder, meng terselfdertyd die glaseerselbestanddele en verf dit oor die kalkoen. As die vel te vinnig verbruin, bedek dit weer met foelie.
    5. Om te kyk of die kalkoen gaar is, druk ’n vurk in die dikste deel van die dy en kyk of die vloeistof wat uitvloei goudkleurig tot deursigtig is. As dit ’n rooierige skakering het, plaas die kalkoen terug in die oond en kyk weer elke 10 tot 15 minute. Of gebruik ’n vleistermometer; die temperatuur moet 72 °C wees wanneer jy dit in die dikste deel van die bors druk.
    6. Plaas die kalkoen op ’n snyplank (plaas die roosterpan eenkant vir die vleissous) en bedek goed met foelie en skoon vadoeke om die hitte te help behou. Laat dit op ’n warm plek vir minstens 30 minute tot 1. uur rus.
    7. Maak die vleissous: Skep enige oortollige vet uit die roosterpan en los net die roostersouse daarin. Plaas die pan oor matige hitte op die stoof en klits die meel by. Laat dit vir 1 minuut kook terwyl jy klits. Klits die aftreksel geleidelik by (skraap enige taai stukkies op die bodem los) en laat dit vir ’n paar minute prut. Klits nou die whisky en heuning by en laat prut vir ’n paar minute terwyl jy af en toe roer. Giet dit deur ’n sif in ’n verhitte sousbeker of ’n skoon kastrol (om weer te verhit). Proe vir geur.
    8. Om die kalkoen voor te sit haal die bedekking af en plaas dit op ’n warm opdienbord. Verwyder hout- of tandestokkies en garneer met salie en brosgebraaide aartappels (resep hier onder), as jy wil. Sit met die vleissous voor. (Verhit weer indien nodig.)

    ELKE PORSIE: (125 g vleis met 50 ml sous, vulsel uitgesluit) 1 160 kJ, 41 g proteïen, 9 g vet (3 g versadig), 5 g koolhidrate (3 g totale suiker), 0 g vesel.

    WERK VOORUIT: Berei die resep tot aan die einde van stap 3 tot ’n dag vooraf. Verkoel. Vir opdiening, laat die gevulde kalkoen weer kamertemperatuur bereik voordat jy dit rooster.

Hou jy hiervan?
op ons GRATIS Goeie Huishouding-resepnuusbrief